Wizara ya Elimu ilianzisha Sheria ya Elimu mwaka 1962 kuashiria kuanza kwa mageuzi katika sekta ya elimu ambapo mkazo mkubwa uliwekwa katika kuwaandaa Watanzania kitaaluma ili kujaza nafasi za Serikali zilizokuwa zimechukuliwa na baadaye kuachwa wazi na wageni.

Hivyo, sheria ya elimu iliagiza shule zote za msingi kuongeza muda wa programu zao za masomo hadi kufikia miaka minane na kusisitiza umuhimu wa kuongeza upatikanaji wa fursa za elimu ya sekondari.

Mabadiliko katika sera ya elimu yalifanyika kwa kuanzisha Sera ya Elimu ya Kujitegemea iliyotokana na Azimio la Arusha. Sera hiyo ililenga kuleta mageuzi katika sekta ya elimu kwa kushughulikia na kuondoa changamoto mbalimbali za mfumo wa elimu ya kikoloni ambayo ilikuwa bado inatumika katika Tanzania huru. Changamoto za mfumo huo zilijumuisha kuzalisha wasomi kwa ajili ya kazi za ofisini, elimu kuwatenga wanafunzi na jamii zao, na elimu kutoakisi maisha na uchumi wa jamii.

Mdororo wa uchumi ulioikumba dunia ulisababisha mabadiliko makubwa ya kijamii na kuleta msukumo mpya wa sera ya uchumi huria kufuatia kushindwa kwa sera ya uchumi wa kijamaa. Kwa sababu hizo, Taifa la Tanzania lilihitaji mwelekeo mpya wa kisera katika elimu na mafunzo hasa kufuatia mabadiliko ya sera za jumla.

Mabadiliko hayo ya sera za jumla yalisababisha Serikali kuchukua hatua madhubuti za kuboresha sekta ya elimu katika kipindi cha mwaka 1981-1990.

Hatua ya kwanza ilikuwa ni kuanzishwa kwa Tume ya Rais ya Elimu ya mwaka 1981. Tume hiyo iliandaa mapendekezo ya mwelekeo wa baadaye wa mfumo wa elimu na kuteua Kikosi-Kazi cha Kitaifa cha Elimu.

Matokeo ya kazi ya Kikosi ni kuwezesha kuandaliwa kwa Sera ya Elimu na Mafunzo ya mwaka 1995. Aidha Serikali katika kuhakikisha kuwa malengo ya Sera ya Elimu na Mafunzo ya Mwaka 1995 inatekelezwa kwa ufanisi, iliandaa Programu ya Maendeleo ya Sekta ya Elimu ya mwaka 1997. Tangu wakati huo, Wizara ya Elimu imekuwa ikiandaa programu mbalimbali za miaka mitano zenye kuendana na Mipango ya Maendeleo ya nchi na utekelezaji wa Dira ya Taifa.

Serikali ilifanya mapitio ya Sera ya Elimu na Mafunzo ya 1995; Sera ya Elimu ya Ufundi na Mafunzo ya 1996; na Sera ya Taifa ya Elimu ya Juu na hivyo kutunga Sera mpya ya Elimu na Mafunzo. Lengo kuu la Sera hiyo lilikuwa ni kukabiliana na changamoto mbalimbali za elimu na mafunzo zikiwamo changamoto zilizobainika katika mfumo wa elimu na mafunzo; uhaba wa walimu na zana; nyenzo na vifaa pamoja na miundombinu ya kufundishia na kujifunzia; na uwepo wa changamoto za ithibati na uthibiti wa ubora wa shule na vyuo.

Tangu utekelezaji wa Sera ya Elimu na Mafunzo 2014 uanze, wadau wa Elimu wamekuwa wakitoa maoni mbalimbali kuhusu utoshelevu na uhalisia wa maudhui ya Sera katika mitaala ya ngazi mbalimbali za elimu na mafunzo. Hoja kubwa za wadau wa elimu ni kuwa maudhui ya sera hii hayajakidhi mahitaji ya mabadiliko ya kiuchumi, kijamii, kisayansi na kiteknolojia.

Kwa muktadha huo, maoni ya wadau wa elimu pamoja na mabadiliko yaliyotokea, yamedhihirisha uhitaji wa mwelekeo mpya wa Sera ya Elimu na Mafunzo. Kwa sababu hizo, Sera ya Elimu na Mafunzo ya 2014, Toleo la Mwaka 2023 (Sera), imejumuisha masuala mbalimbali yaliyojitokeza tangu mwaka 2015 yanayolenga kutatua changamoto za kielimu zilizobainishwa ili kuendana na mipango ya kitaifa na mahitaji ya kikanda na kimataifa.