Waziri wa Elimu, Sayansi na Teknolojia, Prof. Adolf Mkenda, amesema Serikali imeendelea kuweka mkazo katika kuimarisha elimu, ujuzi, sayansi, teknolojia na ubunifu ili kuwawezesha Watanzania kutatua changamoto mbalimbali na kupunguza utegemezi wa teknolojia na wataalamu kutoka nje ya nchi.

Prof. Mkenda ameyasema hayo Agosti 18, 2026, wakati wa Uzinduzi wa Wiki ya Elimu, Ujuzi na Ubunifu 2026 ambapo kuwa amesema Serikali inalenga kuongeza uwezo wa Watanzania katika kubuni na kutumia teknolojia za kisasa, hususan katika maeneo ya sayansi na teknolojia, ili kuhakikisha Taifa linakuwa na wataalamu wenye uwezo wa kutengeneza suluhisho zinazokidhi mahitaji ya ndani.

Amesema utegemezi wa bidhaa, teknolojia na utaalamu kutoka nje ni changamoto inayopaswa kupunguzwa kwa kuwekeza zaidi katika elimu, utafiti na ubunifu. Kwa mujibu wa Prof. Mkenda, Tanzania ina wataalamu wenye uwezo mkubwa ambao wanapaswa kupewa mazingira na fursa za kutumia maarifa yao katika kutengeneza bidhaa na huduma kwa ajili ya maendeleo ya Taifa.

Aidha, amesema Serikali imeendelea kuwekeza katika taasisi za elimu zinazotoa mafunzo ya sayansi, teknolojia na fani mbalimbali za ujuzi, pamoja na kuweka mazingira bora ya kujifunzia na kufundishia. Hatua hiyo inalenga kuongeza idadi ya wataalamu wenye ujuzi unaohitajika katika kujenga uchumi wa kisasa na unaotegemea maarifa.

Prof. Mkenda amesema Serikali pia inaendelea kuimarisha utafiti na ubunifu ili kupata majawabu ya changamoto mbalimbali zinazolikabili Taifa, ikiwemo katika uzalishaji, afya, kilimo, mazingira na matumizi ya teknolojia. Amesema tafiti zinazofanywa zinapaswa kuleta matokeo yanayoweza kutumika moja kwa moja katika kuboresha maisha ya wananchi.

Ameongeza kuwa maendeleo ya sayansi na teknolojia yanapaswa kwenda sambamba na utunzaji wa mazingira, ili uzalishaji na matumizi ya teknolojia visilete madhara kwa kizazi cha sasa na kijacho. Hivyo, amesisitiza umuhimu wa wataalamu na watafiti kubuni teknolojia rafiki kwa mazingira na zinazoweza kutumika kwa muda mrefu.

Vilevile, Prof. Mkenda amesema Serikali inaendelea kuangalia namna bora ya kutumia teknolojia mpya, ikiwemo Akili Bandia (Artificial Intelligence), katika sekta ya elimu na maeneo mengine ya maendeleo. Amesema matumizi sahihi ya teknolojia hizo yanaweza kuongeza ufanisi katika ufundishaji, ujifunzaji, utafiti na uzalishaji wa maarifa.

Ametoa wito kwa taasisi za elimu, watafiti, wabunifu, vijana na wadau wengine kushirikiana na Serikali katika kujenga Taifa linalojitegemea kwa kutumia elimu, ujuzi, sayansi, teknolojia na ubunifu, akisisitiza kuwa ushirikiano huo ni muhimu katika kuhakikisha Tanzania inazalisha wataalamu, bidhaa na teknolojia zinazoweza kushindana ndani na nje ya nchi.

Kitengo cha Huduma za Sheria

Habari

Kurasa za karibu

Matangazo

Taarifa kwa umma

Mahali

Barua Pepe

Habari

Kurasa za karibu

Matangazo

Taarifa kwa umma