Serikali imetangaza fursa mpya za ufadhili wa masomo kwa wanafunzi 10 wa Kitanzania Moscow, Urusi.

Akizungumza leo, Agosti 13, 2026, Dodoma Waziri wa Elimu, Sayansi na Teknolojia Prof. Adolf Mkenda amesema nafasi hizo zimetolewa na Chuo Kikuu cha RUDN Moscow, kufuatia mazungumzo yaliyofanyika wakati wa ziara ya Rais Samia Suluhu Hassan nchini Urusi mwanzoni mwa Juni mwaka huu.

Wanafunzi hao wanatarajiwa kuondoka na kuanza kambi ya mafunzo (Boot camp) Septemba 1, 2026, kwa takribani miezi 10 kabla ya kuanza masomo yao rasmi ya shahada mwaka 2027. Katika kambi hiyo Serikali ya Urusi inagharamia asilimia 80 na Tanzania asilimia 20.

Wanafunzi hao wamechaguliwa kutoka kundi la wanafunzi waliofanya vizuri zaidi katika tahasusi za PCM, PGM na PMC katika mtihani wa Taifa wa kuhitimu kidatu cha Sita. Hawa wanafuatia baada ya 50 waliotangazwa awali hivyo kufanya idadi ya wanufaika wa Samia Scholarship Extended DS/AI + kuongezeka na kufikia 60

Amesema kati ya wanafunzi hao 10, Saba wanatoka shule za sekondari za Serikali na Tatu kutoka shule binafsi.

"Narudia kusema uteuzi wa wanafunzi wa Samia Scholarship unafanyika kwa kuzingatia ufaulu wao katika mitihani, kwa weledi mkubwa," amesisitiza Waziri Mkenda.

Kwa mujibu wa Prof. Mkenda Serikali ya Urusi itagharamia asilimia 80 ya gharama za kambi ya mafunzo, huku SAMIA Scholarship Extended ikigharamia asilimia 20 baada ya kuanza masomo yao ya shahada nchini Urusi, Serikali ya Urusi itagharamia asilimia 100 ya masomo yao.

Fursa hiyo imepatikana kupitia ushirikiano kati ya Serikali ya Tanzania na Urusi. Waziri Mkenda amewashukuru Rais Samia Suluhu Hassan, Waziri wa Mambo ya Nje na Ushirikiano wa Afrika Mashariki, Balozi Mahmoud Thabit Kombo, Katibu Mkuu Wizara ya Mambo ya Nje na Ushirikiano Balozi Dkt. Samwel William Shelukindo na Katibu Mkuu Elimu Prof Carolyne Nombo, Manaibu Katibu wakuu wa Wizara pamoja na maofisa walioshiriki kufanikisha makubaliano hayo.

Hatua hiyo imekuja muda mfupi baada ya Serikali kutangaza wanafunzi 50 watakaopata SAMIA Scholarship Extended kusoma nje ya nchi katika fani za Data Science, Artificial Intelligence na Allied Sciences. Wanafunzi hao wote wameridhia na wataanza kambi ya mafunzo NM-AIST, Arusha, baada ya kufika chuoni Agosti 14, 2026.

Idara ya Elimu ya Juu

Habari

Kurasa za karibu

Matangazo

Taarifa kwa umma

Mahali

Barua Pepe

Habari

Kurasa za karibu

Matangazo

Taarifa kwa umma